*जत हायस्कूल जत मध्ये उच्च माध्यमिक कला शाखेचा ‘पारंपारिक वेशभूषा दिन’ उत्साहात संपन्न…!*
शनिवार, दिनांक. १७ जानेवारी २०२६ रोजी,जत हायस्कूल अँड ज्युनिअर कॉलेज ऑफ आर्ट्स अँड सायन्स जत मधील,उच्च माध्यमिक कला शाखेच्या वतीने, *पारंपारिक वेशभूषा* दिन विद्यालयाच्या सभागृहात उत्साहात संपन्न झाला. कार्यक्रमाची सुरुवात विद्येची आराध्य देवता देवी सरस्वतीच्या प्रतिमा पूजनाने झाली. कार्यक्रमाचे प्रमुख पाहुणे आणि जत हायस्कूल जत चे पर्यवेक्षक, श्री.अरुण कोंडीकिरे सर व कार्यक्रमाचे अध्यक्ष आणि कला शाखेचे विभाग प्रमुख श्री. नंदकुमार गुरव सर यांनी, देवी सरस्वतीचे पूजन करून विद्यार्थ्यांसाठी आशीर्वाद मागितले. उपस्थित मान्यवरांचे स्वागत इयत्ता अकरावीतील विद्यार्थिनींनी छानसे स्वागत गीत गाऊन केले. कार्यक्रमाचे अध्यक्ष आणि प्रमुख पाहुणे यांच्या सत्कार समारंभा नंतर नुकतीच बीएसएफ मध्ये निवड झालेली जत हायस्कूल जत ची माजी विद्यार्थिनी,कु. शुभांगी माने या विद्यार्थिनीचा प्राध्यापक श्री. गुरव सर यांच्या हस्ते सत्कार करून संस्थेच्या आणि प्रशालेच्या वतीने भारत मातेच्या सेवेसाठी शुभेच्छा देण्यात आल्या. त्याचबरोबर नुकतीच इंडियन आर्मी मध्ये निवड झालेला जत हायस्कूल जत चा माजी विद्यार्थी कुमार आयुष कांबळे याचाही सत्कार संस्थेच्या आणि प्रशालेच्या वतीने सर्व प्राध्यापकांनी केला. या कार्यक्रमाच्या प्रास्ताविकपर मनोगतात प्रा.एस. एस बाबर यांनी ,उच्च माध्यमिक कला शाखेच्या वतीने घेत असलेल्या उपक्रमाबाबत विद्यार्थ्यांना माहिती दिली. कलेचे महत्व पटवून दिले. व जत हायस्कूल अँड ज्युनियर कॉलेज ऑफ आर्ट्स अँड सायन्स जत मधील उच्च माध्यमिक कला शाखा गुणवत्तेच्या बाबतीत तालुक्यात नंबर एक आहे, शाळेचा निकाल, क्रीडा परंपरा, शाळा घेत असलेले विविध उपक्रम याविषयी त्यांनी आढावा घेतला. सांस्कृतिक विभाग प्रमुख प्रा. श्री. व्ही. पी. कुलकर्णी यांनी पारंपारिक वेशभूषा दिनाचे महत्व, पारंपारिक सण, पारंपारिक उत्सव यातून आपुलकी,स्नेह वाढीस लागतो व एकमेकात जिव्हाळा निर्माण होतो असे त्यांनी सांगितले. याप्रसंगी विद्यालयाचे परीवेक्षक श्री.अरुण कोंडीकीरे यांनी कार्यक्रमात सहभागी विद्यार्थ्यांचे अभिनंदन करून त्यांना शुभेच्छा दिल्या. तसेच विद्यार्थ्यांच्या कलागुणांना प्रोत्साहन दिले. उच्च माध्यमिक कला शाखेचे विभाग प्रमुख व कार्यक्रमाचे अध्यक्ष, प्रा. नंदकुमार गुरव यांनी विद्यार्थ्यांना मार्गदर्शन करून आजच्या स्पर्धेच्या युगात जर टिकायचे असेल तर विद्यार्थ्यांच्या अंगी विविध कला गुण असले पाहिजेत असे त्यांनी ठामपणे सांगितले. व या कार्यक्रमासाठी त्यांनी शुभेच्छा दिल्या. या कार्यक्रमात इयत्ता अकरावीतील विद्यार्थिनींनी विविध पारंपारिक नृत्ये सादर करून आपल्या संस्कृतीचे दर्शन घडवले. या कार्यक्रमात इयत्ता अकरावीतील कु. ऋतुजा बुवा या विद्यार्थिनीने सादर केलेली लावणी रसिक प्रेक्षक विद्यार्थ्यांचे लक्ष वेधून घेणारी ठरली. शेतकरी गीते, लावण्या, जुन्या नव्या रिमिक्स गाण्याचा सिलसिला यामुळे हा कार्यक्रम अधिक रंगात आला. या कार्यक्रमात सादर करण्यात आलेला फॅशन शो म्हणजेच रॅम्प वॉक याने प्रेक्षकांचे लक्ष वेधून घेतले. मकर संक्रांतीच्या सणाची आठवण करून देऊन,सर्व विद्यार्थ्यांना तिळगुळ देऊन या कार्यक्रमाची गोड सांगता करण्यात आली. या कार्यक्रमाचे निवेदन,कु. भूमिका सवदे या विद्यार्थिनीने केले तर कार्यक्रमाचे आभार,कु. आदिती घोडके या विद्यार्थिनीने मानले. या कार्यक्रमासाठी विद्यालयाचे मुख्याध्यापक श्री. पंडित कांबळे सर,
उपमुख्याध्यापक श्री.एस.डी चौगुले सर यांचे मार्गदर्शन लाभले. कला अध्यापक श्री सुभाष शिंदे सर तसेच तांत्रिक शिक्षण विभागाकडील श्री.सुतार सर यांचे विशेष सहकार्य लाभले.सर्व प्राध्यापक , तसेच शिक्षकेतर सेवक श्री.अरुण कोळी व श्री. विजय जाधव या सर्वांच्या सहकार्याने हा कार्यक्रम अतिशय उत्कृष्ट संपन्न झाला.
मुख्य संपादक : श्री: सुभाष शिंदे
